Zvirongwa zveHurumende zvosimudzira raramo yeruzhinji

Muchaneta ChimukaHURUMENDE iri kufambisa zvirongwa zvikuru zvina izvo zvine chinangwa chekusandura hupenyu hwevanhu zvinosanganisira kusimudzirwa kwenyaya dzezveutano, kurwisa kushandiswa kwezvinodhaka nevechidiki, kugadzirwa pamwe nekuvandudzwa kwemigwagwa uye kuwaniswa kwemvura yakakwana zvekare yakachena kune veruzhinji nechinangwa chekuzadzikisa muono webudiriro inoendeka weVision 2030.Zvirongwa izvi zvinoti kuvandudzwa kwechipatara cheParirenyatwa Group of Hospitals, Angel of Hope Drug Rehabilitation Centre, Trabablas Interchange muHarare neKunzvi Dam iro rava pachidanho chepamusoro chekuvakwa kuGoromonzi, kuMashonaland East.Nomusi weChitatu svondo rino, chikwata chinosanganisira makurukota eHurumende, icho chaitungamirirwa neGurukota rezvekuburitswa kwemashoko Dr Jenfan Muswere vaine Gurukota rezveutano nekurerwa kwevana Dr Douglas Mombeshora neGurukota rinoona nezvekushanda kweveruzhinji neHurumende Cde Daniel Garwe vakamena zvirongwa izvi.Dr Muswere vanoti zvirongwa izvi huchapupu hwekushanda nesimba kuri kuitwa neHurumende nechinangwa chekusimudzira raramo yeveruzhinji.“Hurumende yeSecond Republic haisi kugarira maoko nekuti ine shungu dzekusandura raramo yevanhu Sezvamunoona, mamwe mabhindauko akatangwa makore mazhinji adarika asi haana kuitwa – zvisinei nekuuya kweHurumende yeSecond Republic ichitungamirirwa naPresident Mnangagwa tiri kuona chiedza chikuru Nhasi uno tava kuvakirwa madhamu akadai seKunzvi nemamwe akawanda kuti vanhu vawane mvura uye zvinokwezva vashanyi tichiwanawo mari yekunze.“Mvura yakakosha muupenyu hwevanhu nekuti tinoishandisa mukurima fodya, gorosi nezvimwe zvirimwa takatarisa nyaya dzekusanduka kwemamiriro ekunze vazhinji vava kuona zvakakosha kuti vamhanye nezvirongwa zvemadiridziro.Tinopfuya hove tichitengesa nekudya nemhuri zvichibva mumadhamu iwaya.“Nerimwe divi, Hurumende iri kuvandudza chipatara chikuru cheParirenyatwa Group of Hospitals kuti varwere vabatsirwe panzvimbo yakanaka uye pari kuiswa matengi makuru emvura saka Hurumende yedu ine hanya neutano uye raramo yevanhu,” vanodaro Dr Muswere.Vanoti dhamu reKunzvi riri kutarisirwa kupera kuvakwa muna Zvita gore rino uye pachashandiswa mari inosvika US$100 miriyoni.Zvakadaro, Hurumende yakavaka dzimba dzinosvika 450 dzemhando yepamusoro dzevanhu vaigara pedyo nedhamu iri avo vakabviswa vachinogariswa kune imwe nzvimbo.Dzimba idzi dzine makamuri mana ane mwenje wemagetsi anobva muzuva, imba yekubikira, zvimbuzi nehozi zvinova zvakagamuchirwa nemaoko maviri.Dr Muswere vanotenda zvekare mudzimai wemutungamiriri wenyika, First Lady Dr Auxillia Mnangagwa, nechirongwa chavakatanga mugore ra2025 cheAngel of Hope Drug Rehabilitation Centre icho chiri kuMbare chinova chiri kubatsira vanhu vemazera akasiyana vari kushungurudzwa nekutora zvinodhaka.Vachitaura vari pamuzinda uyu, Dr Mombeshora vanoti vanhu vanotora zvinodhaka vanofanira kugamuchirwa nenharaunda apo vanobva munzvimbo dzavanenge vachibatsirwa nemachiremba kuti vave vanhu vakanaka.“Vanhu vanosvika 90 vari kubatsirwa pamuzinda uno uye tine vamwe 600 vakatonyoreswa kuti vazouyakuzobatsirwa pano Dambudziko rekutorwa kwezvinodhaka riri kukura munyika saka tiri kuda vatsigiri vakawanda vanobatsira mizinda yakadai nekuti vanhu ava vanoda kudya, kurapwa, pekugara nezvimwe

Ngatisasarudza vanhu vanotora zvinodhaka tichivapa mazita anovadzikisira kana vachinge vadzoka munharaunda,” vanodaro.Cde Garwe vanoti kusimudzirwa kwezvivakwa kwakakosha kuti fambirane nenguva.Zambuko reTrabablas Interchange rakaparurwa zviri pamutemo naPresident Mnangagwa munguva pfupi yadarika uye budiriro iyi iri kugamuchirwa nemaoko maviri neveruzhinji sezvo vedzimotokari vave kukwanisa kufamba zvakanaka vachienda kunzvimbo dzakasiyana-siyana.Share on FacebookPost on XFollow usSave

Originally published on Zimbabwe Herald

Source: Zimbabwe Herald