Skoonsus van Seekoeiwater-moordslagoffer verskyn in eMalahleni-hof

Melissa Vice, geklee in ’n warm baadjie, het vandag vlugtig in die eMalahleni-landdroshof verskyn op aanklag van moord op haar swaer, Willie Visser. Sy het vinnig haar plek in die beskuldigdebank ingeneem toe haar saak uitgeroep is. Die saak is nou na die streekhof verwys en is uitgestel tot 17 Junie.

Haar man, Sam Vice, was in die hof om haar te ondersteun,berig dieWitbank Nuus. Vice is in Desember verlede jaar in hegtenis geneem nadat Visser se liggaam naby Seekoeiwater gevind is. Hy was vroeër as vermis aangemeld.

Tydens ’n vorige hofverskyning het skokkende getuienis oor die verloop van die dag aan die lig gekom. Daar word beweer dat Vice vir Visser by ’n winkelsentrum opgetel het en ‘n tyd lank in Hoëveldpark rondgery het voordat sy by Seekoeiwater gestop het. Sy het hom na bewering verwurg en met ’n voorwerp teen die kop geslaan.

[paywall]

Sy het hom glo daarna uit die bakkie getrek en sy persoonlike besittings in die veld gegooi. Vice het later self aan die polisie uitgewys waar die oorledene se besittings weggegooi is.

[/paywall]