Murume arasika njere abata hari mugomo rinoyera

Tendai GukutikwaMURUME wekwaMambo Mutasa kudunhu reManicaland anonzi akatanga kuita seanorasika njere kana kuti abatwa nemweya wakaipa mushure mekunge aenda kune rimwe gomo reko rinonzi rinoyera ndokuchera pasi akawana paine hari yevhu iyo akabata.Izvi zvakabuda mudare raMambo Mutasa nguva pfupi yadarika apo vaitonga nyaya yaNicholas Zuze uyo anonzi akatanga kuita mhirizhonga isinganzwisisike mushure mekunge akanganisa nzvimbo inoyera mugomo reManunure, iro rine chekuita nedzinza rekwaMutasa.Mambo Mutasa vanoyambira vagari vemudunhu ravo kuti vasiyane nekukanganisa nzvimbo dzinoyera.Vanoti nzvimbo dzinoyera dzinosanganisira makuva emadzimambo, makomo nedzimwe dzechivanhu, izvo zvakakosha mukuchengetedzwa kwenhaka yemunharaunda.“Idzi hadzisi nzvimbo njee asi kuti dzinochengetedzwa nemidzimu uye hadzitambwe nadzo, ani nani anodzivhiringa anogona kuzviunzira hasha dzemweya yemadzitateguru uye kukanganisa rugare rwevamwe vakavapoteredza,” vanoyambira vachidaro Mambo Mutasa.Dare rakanzwa kuti Nicholas ari kuita mhirizhonga inotadzisa vanhu kugara zvakanaka munharaunda uye ichisiya mhuri dzepedyo dzichityira hupenyu hwadzo mushure mekunge akanganisa nzvimbo inoera iyi.Zvinonzi ari kufamba imba neimba achiparadza mahwindo nemagonhi.Mudare, Nicholas akabvuma kuti ari kuparadza midziyo iyi asi ndokuti haana simba pamusoro pekuita kwake.“Ichokwadi chose asi handizivi kuti chii chiri kuitika, izvi zvakatanga pandakaenda kugomo rinoera reManunure, ndakachera ndakawana hari yevhu iri pasi, pandakaibata ndakanzwa kuti pane chapinda mandiri Kubva ipapo, ndakatanga kurota hope dzinotyisa, kusanganisira guva, iro rinonzi ndiro rakavigwa mumwe mudzimai wemba yehumambo hwekwaMutasa,” anodaro Nicholas.Anoti anobatwa nemweya uyu unozviti nditateguru werudzi rwekwaMutasa, uchizviti Manunure anobva kwaMutasa.Baba vake, VaLovely Zuze, vanotsinhira nyaya iyi vachiti vainge vatsvaga rubatsiro kun’anga.N’anga iyi inonzi yakavazivisa kuti Nicholas akanga ava nemweya wengozi.“Anoita mhirizhonga yakaipisisa Akaparadza imba yangu, mweya uyu unoti ndewekwaMutasa, wakashatirwa nekucherwa kwakaitwa mugomo rinoyera, tiri kuedza kumubatsira asi zviri kuramba zvichiwedzera,” vanodaro.Mambo Mutasa vanotsinhira kuti Manunure aive mumwe wevanasikana vaMutasa pamwe nemutungamiriri wechidzimai munharaunda iyi uye nekusimbisisa kuera kwegomo reManunure Kunyange vachinzwira mhuri iyi tsitsi, Mambo Mutasa vanoti nharaunda haikwanise kubatwa hunhapwa nenyaya dzemweya dzinenge dzichinetsa munhu, zvikuru kana zvichibva mukusvibisa nzvimbo dzinoyera.“Makomo aya, makuva nenzvimbo dzinoitirwa chivanhu zvinoera, tinogara tichikurudzira vanhu vedu kuti vasachere kana kukanganisa nzvimbo dzakadai, mweya yemadzitateguru inogara munzvimbo idzi inochengetedza ivhu uye inofanira kuremekedzwa, kana mavadenha vanopindura asi kwete nemutsa,” vanodaro.Vanoyambira mhuri yekwaZuze kuti iendese Nicholas kunoongororwa pfungwa dzake zvionekwe kuti hurwere hwake hwaive hwepfungwa here kana kuti huri kukonzerwa nemweya wakaipa.“Tangai mamuendesa kunanachiremba, kana vakatsinhira kuti haisi nyaya yeutano hwepfungwa modzokera kun’anga

Hatifanire kufuratira nyaya dzeutano hwepfungwa munharaunda dzedu, asi tinofanira kuremekedzawo tsika dzedu nenzvimbo dzinoyera,” vanodaro Mambo Mutasa.Nyaya iyi yakaunzwa mudare naEnisia Duri, uyo akarondedzera kuti mamiriro aNicholas ari kukanganisa sei nharaunda yese, kusanganisira mhuri yake.“Mhuri yekwaZuze vavakidzani vedu, Nicholas akaita mhere-mhere kumba kwavo kwemazuva matatu asati asvika pamba pangu ndokupwanya mahwindo nemagonhi achiti akapa muridzi wemba iyi mushonga wekuita mhanza akasabhadharwa Ndakatoshamisika nazvo nekuti izvi hazvina kumboitika, akaita seabatwa nemweya ndokubvutira tsvimbo ambuya vedu vane makore 95 okuberekwa Isu takazvikiyira mumba asi akapwanya gonhi racho Akapwanya mafafitera 39 nemagonhi mana pazuva iroro,” anodaro.Zvisinei nekupindira kwemapurisa, Duri anoti Nicholas anoramba achidzoka uye achitaridza kuti pfungwa dzake hadzina kugadzikana.“Akazodzoka kwapera mazuva, achidana zita rangu, achityisidzira kuti aizondirova

Baba vake havasati vauya kuzoona kuparadza midziyo kwaakaita,” anodaro.Mambo Mutasa vakasimbisisa nyaya yekuti zvakakosha kuti vagari vemudunhu ravo vayanane nemidzimu kuburikidza nekuremekedza nzvimbo dzinoyera.Share on FacebookPost on XFollow usSave

Originally published on Zimbabwe Herald

Source: Zimbabwe Herald