Ba Nokaneng ba re puso

Bontsi jwa banni ba motse wa Nokaneng ba gakolotse gore puso e dire tshekatsheko ya molao-motheo pele e ka simolodisa kgotla ya molao-motheo. Ba buile seo mo phuthegong e e neng e buisiwa ke Tona wa lephata la Papadi le Dikgwebo Rre Tiroeaone Ntsima ka Labone. Mongwe wa banni, Rre Lathang Molonda o ne a gatelela botlhokwa jwa go simolola ka paakanyo ya molao-motheo, a re sengwe se se tshwanetseng sa akarediwa mo paakanyong eo ke go fokotsa dithata tsa ga tautona.

A re go eteletsa pele paakanyo ya molao-motheo go ka dira gore baatlhodi ba ba tlaa tlhophiwang ba kgotla ya molao-motheo ba kgone go ikemela. O bile gape a re go botlhokwa gore puso e tsibogele mathata a apereng banni ba kgaolo eo jaaka go tlhoka ditiro ga banana le letlhoko la ditirelo tse di faphegileng jaaka tsa botsogo. Monni yo mongwe, Mme Andreas Kandjou o ne a re molao-motheo o na le diphatlha tse di bayang Batswana ka fa mosing, ka jalo puso e simolole ka go baakanya one pele.

Rre Papadi Batati ene o ne a re o amogela mogopolo wa go simolodisiwa ga kgotla ya molao-motheo, a re ba solofela fa e ka thusa ka tekatekanyo ya merafe le tekatekanyo ya go phatlaladiwa ga ditlhabololo mo lefatsheng. Rre Batati o ne a re banni ba motse wa Nokaneng le kgaolo ya Okavango ka bophara ba tshelela mo lehumeng ka go sena ditlhabololo tse di rileng ebile temo-thuo e ba ikaegileng ka yone e sa ba tswele mosola ka ntlha ya tshenyo ya diphologolo tsa naga. E rile a ba ema pele, Tona Ntsima a tlhalosa fa kgotla ya molao-motheo e godisa serodumo sa puso ya batho ka batho ka e sireletsa ditshwanelo.

[paywall]

Rre Ntsima a re tiro ya kgotla eo e tlaa akaretsa go sireletsa le go ranola molao-motheo. A re go simolodisiwa ga kgotla ya molao-motheo pele ga tshekatsheko ya molao-motheo go botlhokwa thata ka kgotla a tlaa kaela tshekatsheko eo e bo e thusa go rarabolola dipharologanyo tse di ka nnang teng fa tshekatsheko e dirwa.BOPA

[/paywall]