Gadziriro dzeHeroes Day dzave padanho repamusoro

Munyori weKwayedzaGADZIRIRO dzezuva guru remagamba (Heroes Day), iro richaitwa nemusi weMuvhuro unotevera, dzasvika kwamvura yacheka makumbo uye mhemberero huru dzichange dziri pamuzinda weNational Heroes Acre muHarare, apo mhuri dzinosvika 223 dzemagamba dzinotarisirwa kuve pachiitiko ichi.Vachitaura kuvatori venhau mushure mekupera kwemusangano wedare reCabinet nemusi weChipiri svondo rino muguta reHarare, Gurukota rezvekuburitswa kwemashoko nenyaya dzenhepfenyuro — Dr Jenfan Muswere — vanoti gadziriro dzezuva rakakosha iri munhoroondo yenyika dziri mugwara.“Gadziriro dzekupedzisira dzemhemberero dze2025 Heroes Day dziri kuitwa uye chiitiko chikuru chichange chiri kuNational Heroes Acre muHarare uye, semakore ose, mhemberero dzekumapurovhinzi dzichaitwawo kumapurovhinzi ose ari munyika. Mhuri dzinosvika 223 dzemagamba dzichange dziri pachiitiko chikuru chemuHarare.“Mutungamiri wenyika vachagashidza mireza yenyika kuvamiriri vemhuri dzemagamba mana, ayo akapihwa chiremerera chekuve magamba enyika, anoti Cde Benjamin Burombo, Brigadier-General (Retd) Lameck Francisco Mutanda, Cde John Mbedzi naCde Jairos Jiri,” vanodaro Dr Muswere.Vachitaura pamusoro pemhemberero dzezuva remauto (Defence Forces Day), idzo dziriko nemusi weChipiri chinotevera (12 Nyamavhuvhu), Dr Muswere vanoti dzichaitwa pasi pedingindira rinokurudzira mauto kuona kuti munyika mune runyararo nekugadzikana kuitira kuzadzikisa muono weVision 2030 (Zimbabwe Defence Forces: Guaranteeing Peace and Stability for the Attainment of Vision 2030).Gadziriro dzezuva iri dziri kuitwa kuRufaro Stadium muHarare, apo mauto ari kufanoita zvidobi zvakasiyana-siyana.Vaimbi vane mukurumbira vanotarisirwa kuvaraidza voruzhinji pazuva iri, apo chikwata cheZimbabwe Defence Forces Select chichatamba neSimba Bhora, iyo pari zvino ine mukombe wePremier Soccer League.Share on FacebookPost on XFollow usSave

Originally published on Zimbabwe Herald

Source: Zimbabwe Herald