Esigabeni seWard 8 eSibula eGwanda, izakhamizi zaseSibula leSizeze zithole uncedo oluvela kuDabane Trust, lokwakhelwa idamu elizanceda ukuthi abantu lezifuyo bathole amanzi. Uncedo lolu luhlose ukuvikela ukulahleka kwabantu lezifuyo ngenxa yokusweleka kwamanzi okubangelwe yisomiso seminyaka edluleyo. Izakhamizi zithe zilethemba lokuthi izifuyo zizazuza kakhulu nxa idamu seliphelile.
Intatheli yeCITE ehambileyo ukuyazibonela mathupha indawo okwakhiwa khona idamu ikhulume lezakhamizi zaseSibula. UMnumzana Maphosa uthe balentokozo enkulu ngosizo lolu ngoba luzanceda ukuthi izifuyo zabo zingafi ngenxa yendlala lokuswela amanzi. “Njengezakhamizi, sijabule kakhulu njalo sizazuza kakhulu thina lezifuyo.
Abantu sebezathola amanzi kalula, njalo kuzatholakala inhlanzi edamu. Sizanceda lezinyamazana zeganga ezidinga ukunatha, kuthi abantwana bathole ulwazi lokufunda ngemihlobo ehlukeneyo yezinyamazana,” kutsho uMaphosa. Omunye wezakhamizi, uMaNyathi, uthe izakhamizi kumele zisebenzelane ekubiyeleni idamu ngamadwala ukuze kuvinjwe ukuthi itshebetshebe ingakhukhulelwa edamu, okungaphazamisa ukugcinwa kwamanzi anele.
[paywall]
“Sijabule kakhulu ngokwakhiwa kwedamu ngoba lizasinceda ekugcineni amanzi, kodwa sidinga uncedo ngoba okwamanje sibulala amadwala ngezandla njalo siyawaphakamisa sisakha izindonga zokuvikela amanzi ukuze itshebetshebe ingakhukhulelwa edamu,” kutsho uMaNyathi. UKhansila uZwelihle Nyathi ugcizelele ukuthi idamu leli lizakuba losizo olukhulu kuzakhamizi. “Idamu leli lizanceda kakhulu izakhamizi, izifuyo, lezinyamazana zeganga kanye labantu.
Abantu kumele basebenze ngokuzimisela ukuze umsebenzi uphutshe masinyane. Siyathokoza kakhulu ngosizo esiluthole kuDabane Trust,” kutsho uNyathi. Obemele uMmeli wePhalamende, uLungisani Ncube, laye ulethe amazwi okubonga kuDabane Trust.
“Siyabonga kakhulu kuDabane Trust abathe bafika basinceda. Siyabonga njalo lezakhamizi eziphakame zasebenza ngokuzimisela ekwakheni idamu. Lathi sizasebenza ngamandla sibambisane lazo kuze kuphutshe umsebenzi,” kutsho uNcube.
[/paywall]
